संविधानसभा निर्वाचनको विरोधमा रहेको नेकपा–माओवादी नेतृत्वको मोर्चाले आज खुल्ला मञ्चमा विरोधसभा आयोजना गर्यो।
सभामा बोल्ने मोर्चा सम्बद्ध नेताले मोर्चालाई पाखा लगाएर गरिएको निर्वाचनले जनताको संविधान बन्न सक्दैन भन्दै बहिस्कार आन्दोलनलाई सशक्त र प्रभावकारी बनाउनाको विकल्प नभएको दोहोर्याए।
विरोधसभालाई सम्बोधन गर्दै माओवादीका अध्यक्ष मोहन वैद्यले अहिलेकै परिस्थितिमा गरिने संविधानसभाको निर्वाचनले जनताको संविधान नबन्ने भएकाले कुनै हालतमा निर्वाचनमा नजाने बताए।
अध्यक्ष वैद्यले शान्ति प्रक्रियालाई निष्कर्षमा पुर्याउने हो भने अहिले पनि आफूहरु वार्ताका लागि तयार रहेको बताउँदै त्यसो नभए सडक सङ्घर्षबाटै संविधान बनाइने चेतावनी दिए।
माओवादीका प्रवक्ता पम्फा भुसालले निर्वाचनको नाटक गरेर राष्ट्रिय स्वाधीनतालाई सखाप पार्ने र देशलाई गृहयुद्धतर्फ धकेल्ने षड्यन्त्र भइरहेको बताइन्।
नेकपा (एकीकृत)का महासचिव परी थापाले आफूहरु लोकतन्त्र र निर्वाचनकै पक्षमा भए पनि चार दलीय सिन्डिकेटबाट हुने निर्वाचन नाटक मात्र हुने विचार व्यक्त गरिन्। क्रान्तिकारी कम्युनिष्ट पार्टीका महासचिव मणि थापाले चार शक्तिले अहिले पनि सहमतिमा जान चाहे आफूहरु वार्ताबाटै समस्याको समाधान खोज्न तयार रहेको बताए।
सङ्घीय लोकतान्त्रिक मञ्चका महासचिव खगेन्द्र माखेमले मोर्चाको सहमतिबिना गरिने संविधानसभा निर्वाचनको सशक्त बहिष्कार गरिने चेतावनी दिए। प्रा शास्त्रदत्त पन्तले राष्ट्रिय अखण्डताको रक्षाका लागि राष्ट्रवादी नेपाली एकजुट हुनुपर्ने औल्याए।
No comments:
Post a Comment