गुलरिया, आश्विन २ -
हतियारसहित आएका भारतीय प्रहरीले बुधबार बिहान गुलरिया-८ स्थित मन्जुरप्रसाद श्रेष्ठको घरमा खानतलासी गरेका छन् ।
नेपाल प्रहरीलाई पत्तै नदिई बर्दी र हतियारसहित आएका भारतीय प्रहरीले अपराधी लुकेको भन्दै श्रेष्ठको घरमा खानतलासी गरेका हुन् । नेपाल प्रहरीले भने उनीहरूलाई स्कर्टिङ गरी भारतीय सीमासम्म पुर्याएको थियो ।
उत्तर प्रदेशको लखिमपुरका ओसी -डीएसपी) उदयप्रसाद सिंहको नेतृत्वमा आएका प्रहरीले श्रेष्ठको घरका सबै कोठामा खानतलासी गरेका थिए । जबर्जस्ती पसेर अपराधी 'कहाँ लुकाएको ?' भन्दै आतंक मच्चाएको परिवारले बताएको छ । यूपी ३१ जी ००४६ नम्बरको जिप र नम्बर उल्लेख नभएको अर्को कारमा सादा पोसाक र बर्दी लगाएका १० प्रहरी आएको स्थानीयले बताए । बिहान ६ देखि ७ बजेसम्म करिब एक घन्टा उनीहरू जिल्ला सदरमुकामस्थित श्रेष्ठको घरमा थिए ।
सार्वभौम मुलुकभित्र हतियारसहित अर्को देशका प्रहरी पसेर आतंक मच्चाउँदा पनि नेपाली प्रहरी प्रशासन बेखबर रहेको स्थानीयवासीको गुनासो छ ।
श्रेष्ठको घर जिल्ला प्रहरी कार्यालयबाट उत्तर करिब दुई सय मिटर पर छ । भारतीय प्रहरीले तलासी गर्दा स्थानीयले प्रहरीलाई फोनबाट सूचना दिएका थिए । सूचनालगत्तै पुगेको प्रहरीले उनीहरूलाई स्कर्टिङ गरी फर्काएको हो । 'हामी सुतिरहेका थियौं । एक्कासि ढोका खोल्न लगाए,' श्रेष्ठकी पत्नी देवीले भनिन्, 'जवान छोरी/नातिनी कोठामा सुतेका छन् । भित्र नपस्नुस् भन्दाभन्दै जबर्जस्ती ढोका खोलेर पसे ।'
त्यतिबेला मन्जुर श्रेष्ठ बिहान मर्निङ वाकमा हिँडेका थिए । प्रहरीले छापा मारेपछि परिवार आतंकित छ ।
प्रहरी स्रोतका अनुसार लखिमपुरमा केही दिनअघि भारतीय प्रहरीको हत्यामा संलग्न भारतीय नागरिक बग्गा सिंह र सचिन भनिने डालु मन्जुल लुकेर बसेको खबर पाएर उनीहरू खानतलासी लिन आएका हुन् ।
तीन दिनअघि ती दुवै श्रेष्ठको घरमा आएका थिए । लखनउका आफ्ना मित्रले 'मेरो पाहुनालाई नेपाल घुमाइदिन पर्यो' भन्दै मंगलबार पठाएको श्रेष्ठले बताए । 'उनीहरू अपराधी हुन्/होइनन्, मलाई थाहा भएन,' उनले भने । बिहान भारतीय प्रहरीले छापा मार्दा उनीहरू फरार भइसकेका थिए ।
प्रहरीले श्रेष्ठलाई अपराधी राखेको भन्दै सोधपुछ गरेको छ । उनलाई अपराधी खोज्न प्रहरीले दबाब दिएको परिवारजनले बताए । भारतीय गाडी नेपाल प्रवेश गर्दा पनि प्रहरी प्रशासनबाट कुनै जाँच गरिएको थिएन ।
सीमा सुरक्षाका लागि तैनाथ सशस्त्र प्रहरी बल, नेपाल प्रहरी र ट्राफिक प्रहरीलाई पत्तै नदिई उनीहरू सदरमुकाम गुलरिया प्रवेश गरेका थिए । माथिको आदेश भन्दै नेपाल प्रहरीले भारतीय प्रहरीलाई कुनै सोधपुछ नगरी सीमा कटाएको प्रहरीका एक अधिकारीले बताए । प्रहरीले उनीहरूलाई स्कर्टिङ गरी भारतीय सीमा पुर्याएको थियो । प्रहरी नायब उपरीक्षक राजेन्द्र धमलाले भने हतियारसहित भारतीय प्रहरी नआएको दाबी गरे ।
प्रमुख जिल्ला अधिकारी मानबहादुर विकले घटना निकै गम्भीर भएको र यसबारे भारतीय समकक्ष्ाीसँग पत्राचार गर्ने जनाए ।
सार्वभौमसत्ता हनन हुने गरी नेपाली भूभागमा भारतीय प्रहरी हतियारसहित प्रवेश गरेकामा नेकपा-माओवादीले विरोध जनाएको छ । माओवादी जिल्ला इन्चार्ज द्रव्य शाहले सार्वभौमसत्तामाथिको प्रहार भएकाले यस घटनाको विरोध गरिने जनाए ।
(कास )
