इराकमा रहेका नेपालीको उद्धारका लागि सरकारले कुनै कसर बाँकी नराख्ने -

५ असार, काठमाडौ ।

नेपाल सरकारले इराकमा रहेका नेपाली हालसम्म सुरक्षित अवस्थामा नै रहेको र अपहरण हताहत वा अन्य घटना नपरेको जनाएको छ ।

सुरक्षा स्थिति बग्रिदै गएर सहयोग गर्नुपर्ने अवस्थामा उद्धारका लागि सरकारले कुनै कसर बाँकी नराख्ने स्पष्ट गरेको छ । इराकमा विकसित पछिल्लो घटनाक्रमलाई सरकारले गम्भीरतापूर्वक अवलोकन गरिरहेको बताउँदै परराष्ट्र मन्त्रालयले आज मन्त्रालयमा आयोजित पत्रकार सम्मेलनमा नेपाली हालसम्म सुरक्षित अवस्थामा नै रहेको स्पष्ट गरेको हो ।

इराकमा शसस्त्र आन्दोलनरत विद्रोहीले इराकी सैनिकलाई मारेको दृष्य

“तथापि त्यहाँको खस्कँदो सुरक्षा अवस्थाले कुनै बखत नेपालीलाई पनि प्रभावित पार्न सक्ने देखिएकाले इराकमा रहेका नेपालीलाई सुरक्षित स्थानमा बस्न, बाहिर डुल्न र ननिस्कन तथा सम्भव भएमा व्यवस्था मिलाई नेपाल फर्कन परराष्ट्र मन्त्रालय अनुरोध गर्दछ,” मन्त्रालयका प्रवक्ता दीपक धितालले भन्नुभयो ।

नेपाली बढी केन्द्रित बगदाद, बसरा, कारवाला र नजाफ जस्ता सहरको सुरक्षा स्थिति तुलनात्मक रुपमा स्थिर रहेको बताइएको छ । सरकारले इराकको सुरक्षा अवस्था अझै बिग्रिएमा त्यहाँका नेपालीलाई कसरी उद्वार गर्न सकिन्छ भनेर श्रम, गृह, स्वास्थ्य, पर्यटन र परराष्ट्र मन्त्रालयका प्रतिनिधि सम्मिलित संयन्त्रसमेत बनाएको छ ।

सो संयन्त्रको आज श्रम तथा रोजगार मन्त्रालयमा सरोकार भएकाहरुको बैठक बसेको जानकारी दिँदै सहसचिव प्रकाश सुवेदीले इराकामा रहेको नेपालीको तथ्याङ्क लिने र वैदेशिक रोजगारसँग सम्बन्धित संस्थाले पनि यसमा सहयोग गर्ने वचन दिएको बताउनुभयो ।

इराकमा कति नेपाली कार्यरत छन् भन्ने आधिकारीक तथ्याङ्क सरकारसँग छैन तर त्यहाँ उल्लेख्य सङ्ख्यामा नेपाली रोजगारका लागि गएको बताइन्छ । उद्धारका लागि विदेशस्थित कूटनीतिक नियोग तथा मिसन र अन्तर्राष्ट्रिय संस्थासँग पनि समन्वय गरिने बताइएको छ ।

मन्त्रालयले इराकमा कार्यरत नेपालीका आफन्त, सदस्य, इष्टमित्र वा साथीभाइ जोकोहीलाई इराकमा कार्यरत नेपाली कहाँ बस्छन् र कसरी सम्पर्क गर्न सकिन्छ भनेर जानकारी दिन आग्रह गरेको छ । त्यसका लागि टोल फ्रि नंको व्यवस्था गरिएको र रेस्क्यु एट द रेट मोफा डट जिओभी डट एनपी (rescue @mofa.gov.np) मा सम्पर्क गर्न सकिने मन्त्रालयले जनाएको छ ।

पाकिस्तानस्थित राजदूतावासबाट इराकको परराष्ट्र मन्त्रालयका उच्च अधिकारीसँग सम्पर्क कायम गरिएको र नेपालीको सुरक्षातर्फ विशेष ध्यान आकृष्ट गरिएकामा इराकी विदेशी मन्त्रालयका उच्च अधिकारीले सहयोगको सकारात्मक जवाफ दिएको पनि सो पत्रकार सम्मेलनमा जानकारी दिइयो । रासस